L-istrument finanzjarju tal-Fond għall-Ġestjoni tal-Ilma se jkollu l-għan li jżid id-disponibbiltà u l-kwalità tal-provvista tal-ilma tax-xorb u l-ġestjoni tal-ilma mormi sabiex jipproteġi l-ambjent mill-effetti dannużi tal-ilma mormi, iżid l-għadd ta’ utenti konnessi ma’ sistemi ċentralizzati u l-għadd totali ta’ utenti ta’ sistemi ċentralizzati, itejjeb il-kwalità u l-effiċjenza tas-servizzi u jnaqqas it-telf u l-inċidenti fin-netwerks. Skont l-analiżi tal-Valutazzjoni Preliminari, id-diskrepanza ġenerali fil-finanzjament fis-settur tal-ġestjoni tal-ilma tammonta għal madwar EUR 3.5 biljun. Ir-Repubblika tal-Litwanja topera aktar minn 14 000 kilometru ta’ provvista ta’ ilma tajjeb għax-xorb u aktar minn 10 000 kilometru ta’ netwerks ta’ ġbir ta’ ilma mormi, li aktar minn nofshom iddeterjoraw 60 % jew aktar u għandhom rati baxxi ħafna ta’ telf u infiltrazzjoni tal-ilma. Il-konnessjoni tal-popolazzjoni mal-provvista tal-ilma tax-xorb u n-netwerks tal-ġbir tal-ilma mormi tvarja b’mod konsiderevoli minn muniċipalità għall-oħra — huwa stmat li sabiex jintlaħaq is-sehem ta’ 95 % tal-konsumaturi konnessi, madwar 13 % tal-konsumaturi jeħtieġ li jkunu konnessi man-netwerks tal-ilma tax-xorb u 16 % tal-konsumaturi jeħtieġ li jkunu konnessi man-netwerk tad-drenaġġ. Il-Fond se jipprovdi lill-fornituri pubbliċi liċenzjati tal-ilma tax-xorb u lill-maniġers tal-ilma mormi b’self fit-tul (sa 20 sena) għall-iżvilupp u r-rinnovazzjoni tal-provvista tal-ilma tax-xorb u n-netwerks tal-ġbir tal-ilma mormi.
